Menningar- og fegrunarnefnd Blönduósbæjar hefur náð samkomulagi við systkinin Eystein Pétur Lárusson og Kristínu Ingibjörgu Lárusdóttir um að þau sjái um undirbúning og framkvæmd Húnavöku 2013. Markvert ehf. sagði sig frá verkefninu fyrr í þessum mánuði.

Í gær var fyrsta skóflustungan tekin í dreifikerfi hitaveitu á Skagaströnd. RARIK hefur gert verksamning við GV Gröfur ehf. um framkvæmdina að undangengnu útboði. Undirverktaki við gröft og tenginu veitunnar er Sorphreinsun VH ehf. Verkið hófst með því að grafið var fyrir inntaki að Vallarbraut 4.

Innleiðing Íslykils til innskráningar á vefi stofnana, sveitarfélaga, félagasamtaka og fyrirtækja hefur gengið vonum framar. Ögmundur Jónasson innanríkisráðherra kynnti Íslykilinn þann 12. apríl síðastliðinn og síðan þá hefur hefur eftirspurn og notkun farið stigvaxandi.

Eikarbátarnir tveir Húni II EA 740 og Knörrinn frá Húsavík komu við á Skagaströnd á hringferð sinni um landið þriðjudaginn 21. maí síðastliðinn. Segja má á Húni II hafi verið að koma til heimahafnar aftur eftir 50 ár en hann kom fyrst til Skagastrandar um miðjan júlí árið 1963, þá fullbúinn til síldveiða.

Fulltrúar Kiwanisklúbbsins Drangeyjar, þeir Gunnar Sigurðsson og Jóhannes Þórðarson heimsóttu nemendur 1. bekkjar í Húnavallaskóla í byrjun maí og gáfu þeim hjálma til að nota á reiðhjólum, hlaupahjólum, línuskautum og hjólabrettum. Það er orðinn árlegur viðburður að Eimskip og Kiwanishreyfingin gefi börnum í fyrsta bekk grunnskóla slíka hjálma.

Björgunarfélagið Blanda afhenti á dögunum Húnavallaskóla endurskinsvesti til að nota í vettvangsferðum barna í 1. bekk. Slysavarnafélagið Landsbjörg, í samvinnu við Alcoa Fjarðarál, Dynjanda ehf, EFLA verkfræðistofu, Eflingu stéttafélag, HB Granda, Isavia, Landsvirkjun, Neyðarlínuna, Tryggingamiðstöðina, Umferðarstofu og Þekkingu, hafa síðustu vikurnar verið að gefa öllum skólum á landinu endurskinsvesti.

Fulltrúar þriggja fyrirtækja í ferðaþjónustu skora á stjórnvöld að gera Kjalveg að boðlegri ökuleið fyrir ferðamenn. Segja þeir það skjóta skökku við að bjóða ferðamönnum upp á veg sem 75 þúsund manns nota á ári sem ekki sé almennilega fær. Ekki einu sinni yfir hásumarið.

Sunnudaginn 26. maí næstkomandi mun félagsstarf aldraðra verða með hina árlegu handverssýningu og kaffihlaðborð í Hnitbjörgum. Saman dag verður haldin vorsýning á verkum nemenda í Blönduskóla og opið hús verður í leikskólanum Barnabæ þar sem hægt verður að skoða skólann og afakstur þess starfs sem unnið hefur verið síðastliðna mánuði.

Sýslumaðurinn á Blönduósi auglýsir á vef vinnumálastofnunar sumarstarf námsmanna í samstarfi við Vinnumálastofnun. Um er að ræða almennt skrifstofustarf og er skilyrði fyrir ráðningu að umsækjandi sé námsmaður á milli anna. Umsækjandi þarf að vera 18 ára á þessu ári.

Nú eru fimmtíu ár frá því að happafleytunum Knerrinum og Húna II var hleypt af stokkunum á Akureyri, báðir eru þeir hannaðir af annáluðum skipasmíðameistara, Tryggva Gunnarssyni. Að tilefni hálfrar aldar afmælisins leggja Norðursigling og Hollvinir Húna í hringsiglingu um landið á skipunum tveimur.

Björgunarsveitin Strönd var kölluð út í nótt þegar beiðni um aðstoð barst frá hundrað tonna fiskveiðibáti með fjögurra manna áhöfn sem fengið hafði rækjutroll í skrúfuna um 50 kílómetra úti fyrir Skagaströnd laust eftir miðnætti. Húnabjörg, björgunarskip sveitarinnar, fór af stað til móts við bátinn og tók hann í tog.

Sveitarfélagið Skagaströnd auglýsir á vef sínum sumarstörf námsmanna í samstarfi við Vinnumálastofnun. Störfin eru við ýmis verkefni á vegum sveitarfélagsins meðal annars við skógrækt, umhverfismál og umsjón með golfvelli. Umsóknareyðublöð má fá á skrifstofu sveitarfélagsins. Umsóknarfrestur vegna sumarstarfa námsmanna er til 22. maí næstkomandi.

Kvennakór Akureyrar sækir Blönduós heim 25. maí næstkomandi en þá heldur kórinn sína fyrri vortónleika í Blönduóskirkju klukkan 15:00. Síðari vortónleikarnir verða daginn eftir þann 26. maí í Menningarhúsinu Hofi á Akureyri. Báðir tónleikarnir hafa yfirskriftina „Sólin þaggar þokugrát“, en það er tilvísun í eitt af lögunum sem eru á efnisskránni í ár og hefur einnig skírskotun í komandi sumar og sól.

Breski auðmaðurinn Sir Richard Georg hefur keypt íslenska hesta fyrir í kringum 100 milljónir kr. Þeir eru staðsettir á bænum Lækjarmóti II í Víðidal í Húnaþingi. Eins og kunnugt er af fréttum hefur Sir Richard ákveðið að leggja til um hálfan milljarð króna í uppbygginu á hesthúsi og reiðhöll við bæinn.