Fámennur hópur kvenna hittist í Kvennaskólanum í síðustu viku til skrafs og ráðagerða. Tilefnið var væntanlegt prjónagraff á Blönduósi þetta sumarið.

Ekki komu endanlegar hugmyndir um hvert þema stauranna ætti að vera aðrar en þær að halda áfram með karlana og kerlingarnar í peysum með mynsturbekk en lífga upp á litaval þannig að peysurnar verði líflegri.

Ef einhverjir áhugasamir prjónarar vilja hefjast handa þá er ummál stauranna nokkurn veginn eftirfarandi: 36 cm að ofan og 45 cm að neðan – eða 45 cm að ofan og 51 cm að neðan. Ef prjónað er úr lopa, léttlopa eða tvöföldum plötulopa, þá gæti verið passlegt að fitja upp um 50 lykkjur. Prjónastærð hefur þó nokkur áhrif sem og hversu fast er prjónað.

Eins og áður hefur komið fram þá verður Prjónagleði 2017 haldin hátíðleg hér á Blönduósi 9. – 11. júní og eins og á síðasta ári er stefnt að því að vera búin að skreyta staura bæjarins með prjónagraffi fyrir þá helgi.

Stefnt er að næsta prjónahittingi um miðjan mars, sá fundur verður auglýstur betur þegar nær dregur. Munið að öllum eru velkomið að vera með og framlag allra er vel þegið.