Blönduós er á meðal sveitarfélaga sem komu áberandi verst út þegar skoðuð voru gögn frá undanförnum árum um umferðaróhöpp og umferðarslys sem orðið höfðu á þjóðvegum sem liggja í gegnum þéttbýlisstaði. Óhappatíðnin á Blönduósi, Dalvík, Hvolsvelli og Siglufirði var ýmist mun hærri en meðalóhappatíðni fyrir alla þjóðvegi í gegnum þéttbýli eða tíðnin hafði hækkað síðastliðin ár. Þetta kemur fram í nýrri skýrslu sem unnin var fyrir rannsóknarsjóð Vegagerðarinnar og fjallað er um í Morgunblaðinu í dag.

Fram kemur í frétt Morgunblaðsins að talið sé að ýmissa úrbóta sé þörf á öllum þessum fjórum þéttbýlisstöðum í því skyni að auka umferðaröryggi. Þar á meðal eru miðeyjar á vegum nefndar, þrengingar vega, þéttbýlishlið, það að bæta sjónsvið ökumanna og breyttar útfærslur á gatnamótum. Sum þessara atriða eru þegar komin í framkvæmd.

Fram kemur í skýrslunni að flest óhöpp í þéttbýli verði við vegamót. Eitt það helsta sem hægt er að gera til að auka umferðaröryggi á þjóðvegum er að fækka tengingum inn á vegina og gera breytingar á gatnamótum. Í skýrslunni segir m.a. að forðast skuli að hafa forgangsstýrð X-vegamót og ætti heldur að hafa tvö T-vegamót eða hringtorg. Þá þykir óæskilegt að hafa bílastæði á þjóðvegi og á að leita leiða til þess að aðskilja bílastæði frá veginum eða fjarlægja þau.

Í frétt Morgunblaðsins segir að í nokkrum tilfellum hafi verið rætt um að færa þjóðvegi út fyrir þéttbýlið til að minnka umferðarhraða og umferðarþunga. Margir séu því mótfallnir og telji að það muni draga úr verslun og þjónustu á viðkomandi þéttbýlisstað.

Umferðaröryggi á þjóðvegum í þéttbýli er heiti rannsóknarskýrslunnar sem unnin var fyrir og styrkt af rannsóknarsjóði Vegagerðarinnar. Arna Kristjánsdóttir og Bryndýs Friðriksdóttir hjá EFLU verkfræðistofu unni verkefnið og bera þær ábyrgð á innihaldi skýrslunnar. Markmiðið var að skoða valda kafla á þjóðvegum sem liggja í gegnum þéttbýli og meta hvort laga þurfi vegarkafla til að bæta umferðaröryggi. Valdir voru ellefu staðir þar sem höfðu orðið fleiri en sex slys/óhöpp á vegarkaflanum 2008-2017, meðalóhappatíðni væri hærri en 0,5, íbúar væru færri en 5.000 og að þjóðvegur væri beggja vegna þéttbýlisins.

Sjá nánar í Morgunblaðinu í dag.