Það er gleðiefni að nú standa yfir kosningar til sameiningar Skagabyggðar og Húnabyggðar.

Að þessi sveitarfélög sameinist er dálítið eins og þegar fjölskylda sameinast aftur eftir langan viðskilnað. Minn draumur er sá að öll austursýslan sameinist innan fárra ára.

Hvað er ég að fara með þessu? Voru hér ekki 10 hreppar frá fornu fari og hver hreppur sem lítið ríki með oddvita og hreppstjóra í stafni? Jú það var gamla sveitarfélagagerðin sem lifði fram á síðustu áratug tuttugustu aldarinnar. En með breyttri samfélagsgerð og auknum kröfum til þjónustu sveitarfélaganna, (sem var nýja nafnið á gömlu hreppunum) þá voru þetta of smáar einingar til að geta gengt því hlutverki sem skyldi. Árið 1950 voru sveitarfélögin 229 en eru nú 63. Hefur fækkað um 166. Ég fylgdist með sameiningu vestursýslunnar fyrir tæpum 25 árum.

Þá voru skiftar skoðanir milli íbúa og nokkuð harðar deilur milli manna, en ekki liðu nema 4 til 5 ár þar til íbúar sveitarfélagsins urðu sáttir við sameininguna, enda er Húnaþing vestra nú blómlegt sveitarfélag sem hefur nýtt sér kosti hagkvæmni og sköpunar á ýmsum sviðum.

Ég hef alltaf verið þeirrar skoðunar að austursýslan ætti að vera eitt sveitarfélag. Ég er alin upp í sveitarfélagi sem var alltaf eitt sveitarfélag. Sveitin og þéttbýlið. Þetta sveitarfélag er Vopnafjörður. Ég held eina sveitarfélaið á Íslandi þar sem hlutunum var háttað þannig.

Ég var alin upp við þá skoðun að sveitirnar og þéttbýlið styddu hvort annað og hagsmunir fólksins væru þeir sömu. Ég tileinkaði mér þessa skoðun og hef alltaf haft.

Það er því mikið gleðiefni að fá að kjósa um sameiningu Skagabyggðar og Húnabyggðar á þessum dögum. Þar með yrðu 9 sveitafélag af fyrrum 10 sameinuð.

Það eru ótvíræðir kostir fyrir Húnabyggð að sameinast Skagabyggð. Þótt Skagabyggð sé mikið minna sveitarfélag þá er mikill ávinningur af sameiningunni. Fyrir utan framlög frá Jöfnunarsjóði  sem yrðu mögulega 250 milljónir,  deilt á nokkur verkefni, og yfirlýsingu frá Vegagerð um uppbyggingu á Skagavegi þá verður fjárhagur Húnabyggðar sterkari ef Skagabyggð sameinast.

Þessar upplýsingar má finna í kynningarefni um kosningarnar.

Þarna er bara verið að tala um bein fjárhagsleg áhrif. Óbein eru þau áhrif ávinningsins að fá inn gott  mannlíf og grósku í Skagabyggð, fallega náttúru með marga möguleika til  uppbyggingar ferðaþjónustu og  upplifunar tengdri veiði og útivist.

Ég hvet kjósendur í Húnabyggð til að mæta vel á kjörstaði. Við erum betri sameinuð en sundruð.

Ásgerður Pálsdóttir.