Harmonikkuhátíð fjölskyldunnar fer fram í félagsheimilinu Ásbyrgi á Laugarbakka í Miðfirði dagana 14.-16 júní næstkomandi. Það eru harmonikkufélögin Nikkólína og Grettir sem standa að hátíðinni. Dansleikir verða á föstudagskvöld klukkan 21 og til klukkan eitt eftir miðnætti og á laugardagskvöld klukkan 20 og til miðnættis. Á laugardaginn verður skemmtidagskrá, happdrætti og kaffihlaðborð frá klukkan 14:00.

Harmonikkuhátíð fjölskyldunnar hefur verið haldin árlega mörg undanfarin ár á Laugarbakka og ávallt verið í umsjón harmonikkuunnenda úr Dölunum og Húnavatnssýslum. Harmonikkufélagið Nikkólína hefur starfað í Dölunum um árabil eða allt frá árinu 1981 og Harmonikkufélagið Grettir var stofnað í Húnaþingi vestra árið 2022 en forveri þess voru Harmonikkuunnendur í Húnavatnssýslum.