Afréttir í Húnabyggð hafa verið að opna í vikunni, fyrst í Laxárdal á mánudaginn og á Eyvindarstaðaheiði í gær. Auðkúluheiði opnar í dag, sem og Grímstunguheiði og Haukagilsheiði en þangað er ekki fært að heiðargirðingu eins og er. Á vef Húnabyggðar kemur fram að formenn fjallskiladeild og formaður og varaformaður landbúnaðarnefndar Húnabyggðar hafi komið saman til að fara yfir opnun á afréttum sveitarfélagsins.

Fram kom að gróður sé tilbúinn og fært á allar heiðar, nema á Grímstunguheiði og Haukagilsheiði. Verið sé að vinna í að gera veginn upp á Grímstunguheiði færan, þó ekki sé líklegt að stórir fjárbílar komist þar á næstu dögum. Tilkynnt verður á vef Húnabyggðar þegar vegurinn verður fær.

Þá var farið yfir sleppihólf á Auðkúluheiði og Eyvindarstaðaheiði, sem og í Kirkjuskarði. Vaðið yfir Kirkjuskarðsá hefur verið hreinsað þannig að hægt er að fara með kerrur fram í skarðið. Fram kemur á vef Húnabyggðar að smávægilegar lagfæringar á girðingum hafa verið gerðar en almennt er ekki fært meðfram girðingum og því ekki hægt að ljúka yfirferð á þeim strax. Auk þess er ennþá töluvert frost í jörðu og t.d. ekki hægt að reka niður staura og því er beðið með frekara viðhald þangað til að aðstæður leyfa.