Ég er sólginn í að lesa alls konar fundargerðir, t.d. frá sveitarstjórnum, nefndum og ráðum. Í þeim má finna margt áhugavert og annað minna áhugavert. Í þeim koma oft fram upplýsingar um eitt og annað sem er í gangi hjá viðkomandi sveitarfélagi, samtökum eða stofnunum. Fundargerðir sem þessar eru og eiga að vera upplýsandi fyrir íbúanna. Eitt fer þó í taugarnar má mér, það mikið að mér finnst ástæða til að nöldra yfir því, og það er þegar skýrsla sveitarstjóra, framkvæmdastjóra eða formanns er flutt munnleg og ekkert um hana ritað í fundargerð. Hvaða gagn er af því nema fyrir þá sem sitja viðkomandi fund. Hvers vegna má ekki gera þá kröfu að skýrslan sé skrifleg og bókuð? Sem dæmi, þá voru skýrslur sveitarstjóra Blönduósbæjar settar á vef sveitarfélagsins. Þær vor til dæmis átta talsins árið 2017 en fækkaði svo árið eftir niður í tvær, og aðeins kom ein skýrsla 2019. Þrjár skýrslur litu dagsins ljós árið 2020 og 2021 og tvær skýrslur komu 2022. Engin skýrsla sveitarstjóra hefur verið birt eftir það. Hjá Samtökum sveitarfélaga á Norðurlandi vestra er oftar en ekki dagskrárliður sem heitir „skýrsla framkvæmdastjóra“ og iðulega það eina sem bókað er í fundargerð er „flutt munnlega á fundinum.“ Hversu upplýsandi er það nú? Hrósa má sveitarstjóra Húnaþings vestra fyrir að halda úti dagbók sveitarstjóra. Í henni má lesa hvað drífur á daga hans og hvað er að gerast í vinnunni. Allt mjög upplýsandi og fróðlegt.

Íbúar í Húnabyggð og Skagabyggð tóku vel í að sameina sveitarfélögin en hægt var að kjósa um sameininguna frá 8. júní til og með 22. júní. Þátttaka í kosningunum í Skagabyggð var frábær en rúmlega 92% íbúa kaus og 76% voru fylgjandi sameiningu. Kosningaþátttaka var ekki svona góð í Húnabyggð en þar var kjörsókn rúm 37% en allflestir sem tóku þátt vildu sameiningu eða um 89%. Sameiningin tekur gildi 1. ágúst en þá tekur sveitarstjórn Húnabyggðar yfir stjórn mála í Skagabyggð. Nýtt sameinað sveitarfélag er um 4.500 ferkílómetrar og nær frá Gljúfurá í Þingi í vestri og norður á Skagatá. Inn til landsins eru landamærin í suðri við vatnaskil á Kili. Íbúar í Húnabyggð er um 1.300 og þar af um 850 á Blönduósi en íbúar Skagabyggðar eru um 90 talsins. Sameining sveitarfélaga er fyrir löngu tímabær og hefði átt að gerast í stærri skrefum. Sameining verður þó að gerast á forsendum íbúa ekki stjórnvalda. Og það getur tekið tíma, eins og raungerst hefur í Austur-Húnavatnssýslu og ekkert við því að segja, nema að allt miðar þetta í rétta átt.

Ofboðslega er ég orðinn þreyttur á því að horfa á bálreitt öskrandi fólk í fréttum Ríkissjónvarpsins. Jú, ég er að tala um endalaus mótmæli vegna stríðsins á Gaza. Ég held að allir hljóti að vera sammála um að harmleikurinn sem þar á sér stað verði að stoppa. En halda mótmælendur að ríkisstjórn Íslands geti stoppað stríðið og þá helst Bjarni Ben. Heiftin, illskan, reiðin og ófriðurinn í mótmælendum á sér fá takmörk enda fékk afmælishátíð í tilefni 80 ára afmæli lýðveldisins að kenna á því þann 17. júní. Alls ekki við hæfi kæru mótmælendur og þessi hegðun eykur ekki samhug með ykkur. Ótrúlegt að horfa á afmynduð andlit af illsku og reiði í sjónvarpinu í hverri viku. Það er örugglega hægt að mótmæla með öðrum hætti.

Áhugaverð íbúakönnun landshlutanna 2023 var birt nýlega en þar eru teknar saman helstu niðurstöður íbúa varðandi ýmsa þætti eins og búsetuskilyrði, hamingju og almennt viðhorf til þjónustu sveitarfélagsins. Í könnuninni kemur fram að íbúar í Skagafirði eru hamingjusamastir. Fram kemur að ekki sé mikill munur á milli landshluta hvað hamingju varðar. Íbúar í Húnaþingi vestra eru í þriðja neðsta sæti hvað hamingju varðar en varla er nú hægt að túlka það þannig að þeir séu óhamingjusamastir, eins og gert er í íbúakönnuninni. Ég myndi frekar segja að þeir væru minna hamingjusamir en aðrir. Íbúar í Austur-Húnavatnssýslu eru í sjötta neðsta sæti af 25 svæðum. Ef afstaða íbúa til eigin hamingju er skoðuð milli kannanna, þ.e. 2020 og 2023 kemur í ljós að hún dróst saman hjá íbúum Húnaþings vestra, en stendur í stað hjá íbúum Austur-Húnavatnssýslu. Í könnuninni kemur líka fram að íbúar í Húnavatnssýslunum báðum eru frekar líklegir til þess að flytja á næstu tveimur árum og á það helst við um ungt fólk, en önnur svæði eiga það líka sameiginlegt. Almennt sé finnst íbúum Húnavatnssýslna frekar gott eða mjög gott að búa þar, sem er auðvitað frábært.

Góðar stundir og verum dugleg að taka þátt í því sem verið er að bjóða upp á í Húnavatnssýslum í allt sumar, og alltaf auðvitað.

Nöldri