Laugardaginn 6. júlí næstkomandi klukkan 13 opnar Dóra Sigurðardóttir áhugaverða sýningu í galleríi sínu Listakot Dóru á jörð sinni Vatnsdalshólum. Sýningin er opin á opnunartíma Listakots Dóru klukkan 13-18 alla daga nema mánudaga en sýningin sjálf stendur til 5. september. Sýningin sækir innblástur frá nágrenninu, í Flóabardaga, einn af frægustu bardögum Sturlungaaldar og einu sjóorrustuna sem háð hefur verið við Íslandsstrendur þar sem Íslendingar skipuðu bæði lið.

Þann 25. júní 1244 mættust á Húnaflóa lið Þórðar kakala Sighvatssonar, af ættum Sturlunga og Kolbeins unga Arnórssonar af ættum Ásbirninga. Nú í ár, árið 2024 eru liðin 780 ár frá Flóabardaga og af því tilefni koma ellefu listamenn saman í Listakoti Dóru og sýna verk sín sem eiga skírskotun í þessa frægu sjóorrustu við Íslandsstrendur.

Eftirfarandi 12 listamenn sýna verk sín:

Elísa Ósk Ómarsdóttir
Erla Einarsdóttir
Gudrun Kloes
Guðrún Ósk Aðalsteinsdóttir
Hólmfríður Dóra Sigurðardóttir
Inese Elferte
Morgan C.B.
Óskar Guðmundsson
Rúnar
Sara Jóna Emilía
Þorgeir Gísli Skúlason
Þóra Einarsdóttir

Margvísleg dagskrá á þjóðlegum nótum verður yfir opnunarhelgina. Klukkan 13:20, laugardaginn 6. júlí mun Hilma Eiðsdóttir Bakken kveða rímur.

Ásgeir Guðrúnarson Hólm verður einnig í Listakoti opnunarhelgi sýningarinnar, 6. og 7. júlí og býður upp á nudd á staðnum. Hægt er að panta tíma hjá honum í gegnum síðu hans á Facebook - "Ásgeir Guðrúnarson Hólm (AF Warwik)".

Kvenfélag Svínavatnshrepps selur kakó og vöfflur á staðnum, á opnunardeginum, laugardaginn 6. júlí.