Sveitarfélagið Skagaströnd og Samtök sveitarfélaga á Norðurlandi vestra hafa undirritað samning vegna styrks, að fjárhæð 15 milljónir, til að skapa samvinnurými á Skagaströnd. Markmið verkefnisins er að standsetja og markaðssetja húsnæði í eigu sveitarfélagsins, skapa forsendur fyrir léttan iðnað í hluta hússins og aðstöðu fyrir frumkvöðla og minni fyrirtæki í öðrum hluta þess. Húsið sem um ræðir var áður fiskvinnsluhús, síðast rækjuvinnsla. Sagt er frá þessu á vef SSNV.

Þar kemur fram að nú þegar hafa aðilar sýnt aðstöðunni áhuga til framleiðslu á fullbúnum timburhúsum til flutnings. Mun styrkurinn því vonandi verða til þess að störf skapast á Skagaströnd á næstu misserum og húsnæðið fái nýtt hlutverk.

Sigurður Ingi Jóhannsson innviðaráðherra úthlutaði í febrúar styrkjum að upphæð 130 milljónum króna til tíu verkefna á vegum sjö landshlutasamtaka sveitarfélaga. Styrkjunum er ætlað að efla byggðir landsins og er úthlutað til sértækra verkefna á sóknaráætlanasvæðum í samræmi við stefnumótandi byggðaáætlun fyrir árin 2022-2036. Samtök sveitarfélaga á Norðurlandi vestra fengu samtals 40,5 milljónir króna til þriggja verkefna sem öll eru í Húnavatnssýslum, þar á meðal verkefnið um samvinnurými á Skagaströnd.

Tengd frétt:
Þrjú húnvetnsk verkefni fengu samtals rúmlega 40 milljónir í styrk